బాబు బుర్రలో లైటు వెలిగింది

ఊు... అంటే నేనే కాబోయే ముఖ్యమంత్రి అంటూ ఇన్నాల్లూ కళ్లునెత్తికెక్కించుకుని తిరిగిన చంద్రబాబు ఇప్పుడు దారిన పడ్డాడు. 'వ్యవసాయం దండగ' అని అన్న వ్యక్తి నేడు అన్నదాతల కష్టాలు తీర్చాలంటూ నిరాహారదీక్ష చేస్తున్నాడు. కెసిఆర్‌లాగా ఒక్క రోజులో బిచాణా ఎత్తేసేందుకు ప్రయత్నించలేదు. సంతోషం. చంద్రబాబు మారాడా? మారితే మరీ మంచిది. ఇదే పద్ధతిలో ఎంత సేపు నిలబడతాడో వేచి చూడాల్సిందే...
బాబు ఏ పని చేసినా దాని వెనుక ఓ రెండు మూడు కారణాలుంటాయి. లక్ష్యాలు కూడా అన్నే ఉంటాయి. దీక్షలతో కూడా మనవాడు కుంభాన్ని కొట్టబోతున్నాడు. ఒకటి ఇన్నాళ్లూ పనీపాట లేని తెలుగు తమ్ముళ్లందరినీ 'రైతు' సమస్యలపై జనం దగ్గరికి వెళ్లేట్లు చేయగలిగాడు. జైతెలంగాణా, జై సమైక్యాంధ్ర నినాదాల రందిలో ఎటువైపు పోవాలో తెలియక తికమక పడుతున్న తమ్ముళ్లందరికీ నిజంగా రిలీఫే.. రెండోది కాంగ్రెస్‌ చీలిపోబోతోంది. జగన్‌ కొత్త పార్టీ పెడతానంటున్నాడు. ఆయన తన దగ్గరున్న డబ్బు చూసి విర్రవీగుతున్నాడు. వాళ్ల నాయన పేరును బ్రాండు ఇమేజీగా ప్రచారం చేసి గద్దె నెక్కాలనుకుంటున్నాడు. జగన్‌ చేసే ఏ ప్రయత్నమైనా కాంగ్రెస్‌ను చీల్చేయడం ఖాయం. అదే జరిగితే తక్షణం రాష్ట్ర వ్యాప్తంగా అడ్వాంటేజీ తీసుకుని గద్దెనెక్కాల్సిందీ తెలుగుదేశమే. కాంగ్రేసోళ్లు వాళ్ల పంచాయతీలో పడి జనం సమస్యలను మరిచిపోయారని, కమ్యూనిస్టోళ్లలాగా తాను కూడా సమస్యలపై పోరాడుతున్నానని చెప్పుకునేందుకు ఈ దీక్షలు చంద్రబాబుకు పనికొస్తాయి. మూడోది ప్రత్యేక తెలంగాణా అంశం... ఓ వైపు శ్రీకృష్ణ కమిటీ నివేదిక ఇవ్వబోతోంది. అదేం చెప్పినా రాష్ట్రం రావణకాష్టం కావడం ఖాయం. ఆ తరువాత జనం దగ్గరికి సమస్యలను, పార్టీని తీసుకుపోలేం. ఆ కమిటీ నివేదిక ఇచ్చేలోగానే ఇలాంటి కార్యక్రమం చేస్తే ఈ సమస్యా తీరిపోతుంది.
మొత్తానికి దీక్షలు చేపట్టాలనుకున్న బాబు నిర్ణయం రైట్‌ టైమ్‌లో రైట్‌ డెసిషన్‌ తీసుకున్నట్లుగా ఉంది. అయితే మళ్లీ చెబుతున్నా... చంద్రబాబు తాను తన మాట మీద ఎన్నాళ్లు నిలబడతాడు అన్నదానిపైనే ఫలితాలు ఉంటాయి.. వెయిట్‌ అండ్‌ సీ...